กุสลํ นเหตุญฺจ อพฺยากตํ นเหตุญฺจ ธมฺมํ ปฏิจฺจ อพฺยากโต นเหตุ ธมฺโม อุปฺปชฺชติ นอารมฺมณปจฺจยาฯ (1)

อกุสลํ นเหตุญฺจ อพฺยากตํ นเหตุญฺจ ธมฺมํ ปฏิจฺจ อพฺยากโต นเหตุ ธมฺโม อุปฺปชฺชติ นอารมฺมณปจฺจยาฯ (1) (สํขิตฺตํฯ)

[19] นเหตุยา เอกํ, นอารมฺมเณ ปญฺจ, นอธิปติยา นว, นอนนฺตเร ปญฺจ, นสมนนฺตเร ปญฺจ, นอญฺญมญฺเญ ปญฺจ, นอุปนิสฺสเย ปญฺจ, นปุเรชาเต สตฺต, นปจฺฉาชาเต นว, นอาเสวเน นว, นกมฺเม ตีณิ, นวิปาเก นว, นอาหาเร เอกํ, นอินฺทฺริเย เอกํ, นฌาเน เอกํ, นมคฺเค เอกํ, นสมฺปยุตฺเต ปญฺจ, นวิปฺปยุตฺเต ตีณิ, โนนตฺถิยา ปญฺจ, โนวิคเต ปญฺจ (สํขิตฺตํ)ฯ

เหตุปจฺจยา นอารมฺมเณ ปญฺจ (สํขิตฺตํ)ฯ

นเหตุปจฺจยา อารมฺมเณ เอกํ (สํขิตฺตํ)ฯ

(สหชาตวารมฺปิ ปจฺจยวารมฺปิ นิสฺสยวารมฺปิ สํสฏฺฐวารมฺปิ สมฺปยุตฺตวารมฺปิ ปฏิจฺจวารสทิสา วิตฺถาเรตพฺพาฯ)

7. ปญฺหาวาโร

ปจฺจยจตุกฺกํ

อารมฺมณปจฺจยาทิ

[20] กุสโล นเหตุ ธมฺโม กุสลสฺส นเหตุสฺส ธมฺมสฺส อารมฺมณปจฺจเยน ปจฺจโยฯ กุสโล นเหตุ ธมฺโม อกุสลสฺส นเหตุสฺส ธมฺมสฺส อารมฺมณปจฺจเยน ปจฺจโยฯ กุสโล นเหตุ ธมฺโม อพฺยากตสฺส นเหตุสฺส ธมฺมสฺส อารมฺมณปจฺจเยน ปจฺจโยฯ (3)

อกุสโล นเหตุ ธมฺโม อกุสลสฺส นเหตุสฺส ธมฺมสฺส อารมฺมณปจฺจเยน ปจฺจโยฯ อกุสโล นเหตุ ธมฺโม กุสลสฺส นเหตุสฺส ธมฺมสฺส อารมฺมณปจฺจเยน ปจฺจโยฯ อกุสโล นเหตุ ธมฺโม อพฺยากตสฺส นเหตุสฺส ธมฺมสฺส อารมฺมณปจฺจเยน ปจฺจโยฯ (3)

อพฺยากโต นเหตุ ธมฺโม อพฺยากตสฺส นเหตุสฺส ธมฺมสฺส อารมฺมณปจฺจเยน ปจฺจโยฯ อพฺยากโต นเหตุ ธมฺโม กุสลสฺส นเหตุสฺส ธมฺมสฺส อารมฺมณปจฺจเยน ปจฺจโยฯ อพฺยากโต นเหตุ ธมฺโม อกุสลสฺส นเหตุสฺส ธมฺมสฺส อารมฺมณปจฺจเยน ปจฺจโยฯ (3)

[21] กุสโล นเหตุ ธมฺโม กุสลสฺส นเหตุสฺส ธมฺมสฺส อธิปติปจฺจเยน ปจฺจโยฯ กุสโล นเหตุ ธมฺโม อกุสลสฺส นเหตุสฺส ธมฺมสฺส อธิปติปจฺจเยน ปจฺจโยฯ กุสโล นเหตุ ธมฺโม อพฺยากตสฺส นเหตุสฺส ธมฺมสฺส อธิปติปจฺจเยน ปจฺจโยฯ กุสโล นเหตุ ธมฺโม กุสลสฺส นเหตุสฺส จ อพฺยากตสฺส นเหตุสฺส จ ธมฺมสฺส อธิปติปจฺจเยน ปจฺจโย… จตฺตาริฯ

อกุสโล นเหตุ ธมฺโม อกุสลสฺส นเหตุสฺส ธมฺมสฺส อธิปติปจฺจเยน ปจฺจโย… ตีณิฯ

อพฺยากโต นเหตุ ธมฺโม อพฺยากตสฺส นเหตุสฺส ธมฺมสฺส อธิปติปจฺจเยน ปจฺจโยฯ อพฺยากโต นเหตุ ธมฺโม กุสลสฺส นเหตุสฺส ธมฺมสฺส อธิปติปจฺจเยน ปจฺจโย… ตีณิฯ

[22] กุสโล นเหตุ ธมฺโม กุสลสฺส นเหตุสฺส ธมฺมสฺส อนนฺตรปจฺจเยน ปจฺจโยฯ กุสโล นเหตุ ธมฺโม อพฺยากตสฺส นเหตุสฺส ธมฺมสฺส อนนฺตรปจฺจเยน ปจฺจโยฯ (2)

อกุสโล นเหตุ ธมฺโม อกุสลสฺส นเหตุสฺส ธมฺมสฺส อนนฺตรปจฺจเยน ปจฺจโยฯ อกุสโล นเหตุ ธมฺโม อพฺยากตสฺส นเหตุสฺส ธมฺมสฺส อนนฺตรปจฺจเยน ปจฺจโยฯ (2)

อพฺยากโต นเหตุ ธมฺโม อพฺยากตสฺส นเหตุสฺส ธมฺมสฺส อนนฺตรปจฺจเยน ปจฺจโย… ตีณิ…เป.…ฯ

อุปนิสฺสยปจฺจโย

[23] กุสโล นเหตุ ธมฺโม กุสลสฺส นเหตุสฺส ธมฺมสฺส อุปนิสฺสยปจฺจเยน ปจฺจโยฯ กุสโล นเหตุ ธมฺโม อกุสลสฺส นเหตุสฺส ธมฺมสฺส อุปนิสฺสยปจฺจเยน ปจฺจโยฯ กุสโล นเหตุ ธมฺโม อพฺยากตสฺส นเหตุสฺส ธมฺมสฺส อุปนิสฺสยปจฺจเยน ปจฺจโยฯ (3)

อกุสโล นเหตุ ธมฺโม อกุสลสฺส นเหตุสฺส ธมฺมสฺส อุปนิสฺสยปจฺจเยน ปจฺจโยฯ อกุสโล นเหตุ ธมฺโม กุสลสฺส นเหตุสฺส ธมฺมสฺส อุปนิสฺสยปจฺจเยน ปจฺจโยฯ อกุสโล นเหตุ ธมฺโม อพฺยากตสฺส นเหตุสฺส ธมฺมสฺส อุปนิสฺสยปจฺจเยน ปจฺจโยฯ (3)

อพฺยากโต นเหตุ ธมฺโม อพฺยากตสฺส นเหตุสฺส ธมฺมสฺส อุปนิสฺสยปจฺจเยน ปจฺจโยฯ อพฺยากโต นเหตุ ธมฺโม กุสลสฺส นเหตุสฺส ธมฺมสฺส อุปนิสฺสยปจฺจเยน ปจฺจโยฯ อพฺยากโต นเหตุ ธมฺโม อกุสลสฺส นเหตุสฺส ธมฺมสฺส อุปนิสฺสยปจฺจเยน ปจฺจโยฯ (3) (สํขิตฺตํฯ)

[24] อารมฺมเณ นว, อธิปติยา ทส, อนนฺตเร สตฺต, สมนนฺตเร สตฺต, สหชาเต นว, อญฺญมญฺเญ ตีณิ, นิสฺสเย เตรส, อุปนิสฺสเย นว, ปุเรชาเต ตีณิ, ปจฺฉาชาเต ตีณิ, อาเสวเน ตีณิ, กมฺเม สตฺต, วิปาเก เอกํ, อาหาเร สตฺต, อินฺทฺริเย สตฺต , ฌาเน สตฺต, มคฺเค สตฺต, สมฺปยุตฺเต ตีณิ, วิปฺปยุตฺเต ปญฺจ, อตฺถิยา เตรส, นตฺถิยา สตฺต, วิคเต สตฺต, อวิคเต เตรส (สํขิตฺตํ)ฯ

นเหตุยา ปนฺนรส, นอารมฺมเณ ปนฺนรส (สํขิตฺตํ)ฯ

อารมฺมณปจฺจยา นเหตุยา นว (สํขิตฺตํ)ฯ

นเหตุปจฺจยา อารมฺมเณ นว (สํขิตฺตํ)ฯ

(ยถา กุสลตฺติเก ปญฺหาวารํ, เอวํ วิตฺถาเรตพฺพํฯ)

2-1. เวทนาตฺติก-เหตุทุกํ

1-6. ปฏิจฺจวาราทิ

ปจฺจยจตุกฺกํ

[25] สุขาย เวทนาย สมฺปยุตฺตํ เหตุํ ธมฺมํ ปฏิจฺจ สุขาย เวทนาย สมฺปยุตฺโต เหตุ ธมฺโม อุปฺปชฺชติ เหตุปจฺจยาฯ (1)

ทุกฺขาย เวทนาย สมฺปยุตฺตํ เหตุํ ธมฺมํ ปฏิจฺจ ทุกฺขาย เวทนาย สมฺปยุตฺโต เหตุ ธมฺโม อุปฺปชฺชติ เหตุปจฺจยาฯ (1)

อทุกฺขมสุขาย เวทนาย สมฺปยุตฺตํ เหตุํ ธมฺมํ ปฏิจฺจ อทุกฺขมสุขาย เวทนาย สมฺปยุตฺโต เหตุ ธมฺโม อุปฺปชฺชติ เหตุปจฺจยาฯ (1) (สํขิตฺตํฯ)

[26] เหตุยา ตีณิ, อารมฺมเณ ตีณิ, อธิปติยา ตีณิ…เป.… วิปาเก ทฺเว…เป.… อวิคเต ตีณิ (สํขิตฺตํ)ฯ